TANINMIŞ ÖZBƏK YAZIÇISININ KİTABI AZƏRBAYCANDA YAYINLANDI
Bu günlərdə çağdaş özbək ədəbiyyatının istedadlı nümayəndələrindən biri olan Rüstəm Cabbarovun “Xəyanətin kəsişməsi” adlı kitabı Azərbaycanda yayınlanmışdır. Tanınmış jurnalist Ədalət Məmmədovun orijinaldan çevirdiyi, yazıçı Vaqif Sultanlının redaktoru olduğu kitaba müəllifin müxtəlif dönəmlərdə detektiv mövzularda qələmə aldığı
“Kitabın arasındakı məktub” və “Xəyanətin kəsişməsi” adlı iki povesti daxil edilmişdir.
Qeyd edək ki, Rüstəm Cabbarov 1979-cu ildə Səmərqənd vilayətinin Urqut rayonunda doğulmuşdur. Özbəkistan Milli Universitetinin jurnalistika fakultəsini bitirdikdən sonra “Respublika”, “Kənd həyatı”, “Darakçı” qəzetlərində müxbir, redaktor müavini və baş redaktor kimi çalışmış, habelə Özbəkistan Milli Xəbər Agentliyinin baş redaktor müavini vəzifəsini icra etmişdir.
Rüstəm Cabbarov iyirmidən cox bədii, publisistik və tərcümə kitabının müəllifidir. Şeir, hekayə və publisistik məqalələri Azərbaycan, Özbəkistan, Hindistan və başqa ölkələrdə dərc olunmuşdur. Dünyanın tanınmış klassiklərindən Gi de Mopassan, Edqar Po, Qabriel Qarsia Markesin əsərləri ilə yanaşı, Azərbaycan ədəbiyyatından Anar, Sabir Rüstəmxanlı, Vaqif Sultanlı, İlqar Fəhmi və başqa yazıcıların hekayə, povest və romanlarını özbək dilinə çevirərək yayınlamışdır. Rüstəm Cabbarovun müəllifliyi ilə çəkilmiş “Vicdan” (2007), “Yoxsul adam” (2011), “Asragil” (2017) və ”Namus” (2017) və başqa bədii filmlər Özbəkistanda böyük şöhrət qazanmışdır.
Rüstəm Cabbarovun “Xəyanətin kəsişməsi” kitabına daxil edilmiş hər iki povest (“Kitabın arasındakı məktub” və “Xəyanətin kəsişməsi”) ilk öncə “Kredo” qəzetinin 2018-2019-cu il saylarında hissə-hissə yayınlanmışdır.
Kitaba “Janrların kəsişməsi: modern nəsr texnikasında detektiv” adlı geniş ön söz yazmış filologiya üzrə fəlsəfə doktoru Samirə Məmmədli qənaətlərini belə ümumiləşdirir: “Rüstəm Cabbarovun təqdim edilən kitabının sizdə maraq doğuracağına əminik, kitabın içindəki əsərlər modern nəsr texnikasına uyğun şəkildə qələmə alınıb, hesab edirik ki, bu mətnlər detektiv janrının məhz müəllifə xas bir sıra elementlərlə zənginləşməsi ilə də diqqəti çəkəcəkdir. Bu kitab eyni zamanda, Azərbaycan - Özbəkistan ədəbi əlaqələrinin inkişafı və ədəbi proseslərin yaxınlaşması və qovuşması baxımından əhəmiyyətli rol oynayacaqdır”.
