Edebiyyat.az » Poeziya » Jasmindən yeni şeirlər

Jasmindən yeni şeirlər

Jasmindən yeni şeirlər
Poeziya
admin
Müəllif:
08:12, 29 avqust 2022
170
0
Jasmindən yeni şeirlər




Ah, bir bilsən, qəlbimdə necə əzab çəkirəm

Darıxmağın ən incə tellərində əsirəm.

Məsələn, darıxanda əllərin yada düşür,

Saçlarımı hörməyən əllərini gəzirəm.

Sonra daraq ucunda tellərin yada düşür,

Çiynimdən sürgün olan tellərini gəzirəm.

Sonra birdən zümzümə etdiyin musiqinin həsrət qoxan sözləri durmadan yada düşür.

Qulağımı oxşayan eşq səsini gəzirəm.

Birdən hava qaralır,

Gözlərin yada düşür.

Ruhumu itirdiyim gözlərini gəzirəm.

Birdən gecə tam yarı,

Bədən yanıb tutuşur... izlərin yada düşür,

Sevgini əks etdirən izlərini gəzirəm...

Sonra birdən nolursa, susayır dil-dodağım... 

Busələr yada düşür,

İçimi susuzduran ləblərini gəzirəm.

Birdən əlim ilişir yatağın sol küncünə, üşüyür bütün ruhum,

Sol yanımı isidən o ətrini gəzirəm.

Getdikcə hey batıram darıxmağın içində,

Artıq gücüm çatmayır darıxmağın əlində 

o yan bu yan gəzməyə...

Alıb telefonumda sildiyim on rəqəmi yenə yığıb yaddaşa Darıxmağım qoyuram...

Dəfələrcə pozduğum mesajların yerinə “Darıxıram...” yazıram, 

Qürurumu tapdayıb sağ düyməni basıram...

 

***

 

Bir sevgilik ruhum var,

O da boşa xərclənir.

Sənə olan sevgim də

Darıxmaqdan dərdlənir.

 

Gözümdən ovucuma

Damla-damla tökülür.

Sən əkilən sol yanım

Hər gün bir az sökülür.

 

Hər gün gözüm yol çəkir

Sən sökdüyün yollara.

Elə darıxmışam ki,

Məni qucan qollara.

 

Hər gün Bakım əsəndə

Düz önündə dururam.

Səndən gələn ətirin

Xəyalını qururam.

 

Tuturam buludlardan,

Hey cizgini çəkirəm.

Səndən yetim ömrümə

Sənli ümid əkirəm.

 

Bilirəm, dönəcəksən,

Yoxluğun əldən salıb.

Nə olsun ki, getmisən,

Ürəyin məndə qalıb.

 

***

 

Saçlarım darıxıbdır

Əlinin sığalına.

Bir öpücük göndərsən,

Qondursam uclarına.

 

Gecələri pərişan 

Yastığıma uzansın,

Sərin bir meh göndərsən,

Qoy mehi də sən sansın.

 

Səhərin günəşi də 

Boyasın saçlarımı.

Mən çilli günəş qızı

Axıtma yaşlarımı.

 

Telimi bəhanətək

Düzmüşəm sözlərimə,

Hicranın toz misalı

Düşmüsən gözlərimə.

 

Çöldə avqust istisi, 

Içimdə darıxmaqlar.

Görən Bakı dolumu

Mənimtək bir axmaqla?!

 


 

Ctrl
Enter
ohv tapdınız?
Ctrl+Enter sıxıb bizə bildirin
Müzakirə (0)