İbrahim Tığdan 3 şeir

(Türkiyə)

SARI AYLAR*

insan keçmişi ilə danışmalı

dərdi anam anlatmalı

bir uşağın gözlərində gizlənən quyu

hər qadın öz yarasıyla döllənər,

dərdi atam, döllənər də,

bu alnındakı hansı gülün qoxusu

atasız və ağır keçdi sarı aylarım

türkü qoxuyan bir məktub içindəki həsrət

üzüm bir şəhərə dönüşürdü

içimdən qayıqlar keçir, mor əqrəblər

nəhəng pəncəsiylə zaman...

bir atın şüur altıdır içimdəki göy üzü

anam, insan keçmişilə danışmalı

dərdi həm,

gün gələr ünvanlar da ölürmüş məgər

ANAM YIXILDI

mən o evin sidr tozuna** xatirələri bulaşmış uşaq

ölü pişiklərin əski fotolardan düşən rəsmini toplayıram

əfsunlu quşlar havalanır, əncir dadında

yumdu qadını gözlərini bir ana

üzü nağılların əski kölgəsi

anam, bir qönçənin tacı düşsə

inciyərdi, taxtalı köyün*** hökmlü sakinləri

sevişməyə hazır yeraltı suları dəhlizlər və sirr

məni də tərk edərkən bir tanrıyla aldatdın

kəndin bir meşəsi tozlu küçələrini

sevərmiş kimi oxşardı, küçə lampaları

əski bir cindar, çörək qırıntılarına

cuman qarışqalar, misgərlər kəndində

bir ququ quşudur artıq zaman

nə zaman uşaqlığıma üz tutsam

yüzlərlə kəlmə qopar o yaydan

çəkilər əl-ayaq, eşiyi cəhənnəm.

üzündə respublika aydınlığının sirli

lampası,tanrı bir ərköyün oğlana döndü.

anam yıxıldı!..

ATA

atasız günlər keçirdim həyatda

zamanı sınadım, anamın ağzında

xatirələri öləzimiş ötkün bir sözəm.

atamla başlayan sabah cəsədlə bitərdi

hər gecə. başqası olmanın kəfənsiz burğacında.

öncə meyvəçi zehnli əmimiz getdi. bir axşamüstü

duydum şenoldan.amma şən olmadım

ölüm günləri hey üstümə gəlir

sıxıntının özəyinə yürüdüyümü sanaraq

keçdiyim qapılardan əks-sədayla oyanıram

 -------------------------------------------------------------------------------------------

*Sarı ay – Türkiyədə məhsul vaxtı axşam çağları sarı rəngə çalan aya deyilir. Hasat ayı, yəni məhsul ayı da deyirlər.

**”Taxtalı köy” – türklər məzarlığa taxtalı köy deyirlər. Qədim şaman inancına görə insanı dəfn edərkən baş daşı əvəzinə taxta, ağac parçası bitirərmişlər. Bu insanın ağac simvoluna inamından irəli gəlir. Əski türklər ilk anaya da kayın ana, deyərmişlər. “Kayın” əslində “kadın” deməkdir ki, “k” səsinin “y” səsi ilə əvəzlənməsindən yaranıb.

***Sidr tozu – iynəyarpaqlı sidr ağacının tozu. İnanca görə bu toz müqəddəs sayılır, şəfalıdır.

                                                                                                                                    Çevirdi A.Qaradərəli