ELÇİN MƏHƏRRƏM - KAKTUSLAR MƏCƏLLƏSİ-64 (povestdən bir hissə)
6.
Onu xəstəxanaya lap tez çatdırdılar. Amma,çoxlu qan itirmişdi.Qanın izlərini reklam etdiyimiz təmizləyici vaistə asanlıqla çıxardı. Bəzi işçilər Topal Tiqranın itinə lənət oxudular. Dedilər nahaq öz yiyəsini tutub. Bəziləri isə Tiqrana lənət oxudu. Dedilər nahaq onu ac saxlayırdı. Amma,mən bilirdim Topal Tiqran heç vaxt itini ac saxlamırdı. Vaxtlı-vaxtında yalını verir, suyunu dəyişirdi. Heç onu zəncirləmirdi də. İtə azadlıq vermişdi. 3 nömrəli vərəqdə qeyd etməyi unutduğum bir şey var. Həmin gün sahib Ceffersonla, milliyyətcə yapon olan Xaş-xaş Akaki itin lap yaxınlığında olublar. Akaki itin başına sığal çəkib sonra çənəsinin altını barmaqları ilə qaşıyıb. Cefferson isə siqarını püfüldədə-püfüldədə iti elektrik dirəyinə zəncirləyib. Topal Tiqran da kənardan gülə-gülə baxırmış. Ceffersonla, Akaki ofisə qalxdıqdan 10 dəqiqə sonra məlum hadisə baş verib. İt zənciri qırıb...
Xəstəxanadan cavab gəldi. Tiqranın hər iki ayağına infeksiya keçmişdi. Amputasiya olunması üçün razılıq istəyirdilər. SOS ! Təcili toplantı keçirildi. 3 nömrəli vərəqdə qeyd etdiyim hər kəs toplantıda iştirak edirdi. Cefferson oturduğu yerdən qalxdı. Boğazını arıtladıqdan sonra sözə başladı.
Əziz, dəyərli həmkarlar ! Bu gün bura vacib bir məsələnin həlli ilə bağlı toplaşmışıq. Bildiyimiz kimi, bizim şirkətin adı artıq brendə çevrilib. Keçən dəfə dostumun əmisi nəvəsinə ad günü hədiyyəsi almaq üçün kiçik brujuva mağazalarının birinə girmişdim. Mağazaya addımımı atan kimi, “Today” ətirli sarışın ortaboylu qız,üstümə tullandı. Məni o qədər öpdü ki.Heç pişik yeni doğduğu balasını belə yalamır. Afrodizyak yox, fanat sevgisi. Mundus vult desipi (Dünya aldadılmaq istəyir) Mən neyləyə bilərəm ? İndiysə keçək digər məsələyə. Mənə xəstəxanadan zəng vurmuşdular. Topal Tiqranın ayaqlarının kəsilməsi ilə bağlı razılığımızı almaq istəyirlər. Əgər ayaqları kəsilməsə ölə bilər. Bəli...Bu mühüm məsələdi. Amma,olduqca vacib bir məsələ daha var. Əgər biz onun ayaqlarının kəsilməsinə razılıq versək bundan sonra ona necə müraciət edəcəyik?
Otağa sükut çökdü. Bu sükutu əslən Mərakeşdən olan İynəli Rüqəyya pozdu. O ayağa qalxdı. Ağzını marçıldatdıq sonra sözə başladı.Bilirsiniz mən bir ay ərzində 5 kiloqram çəki atmışam ? 105 kiloqramdan 100-ə düşmüşəm. Xüsusi dieta saxlayıram.Tiqran da həmişə mənim çəkimə ilişirdi.Əgər it onu dişləməsə idi, əvvəl-axır bunu mən edəcəkdim. Amma yenə də ona yazığım gəlir. Ona necə müraciət edəcəyik deyə bayaqdan baş sındırıram. Mən təklif edirəm ki, ona İt Tiqran deyək. Hamı bu fikri alqışladı. Mən də alqışladım. Rüqəyya xoşhal oldu və yerinə oturdu. Ardınca Xaş-xaş Akaki yerindən qalxdı. Gözlərini divardan asılan Napoleonun portretinə zillədi. O danışarkən gah əliylə burnuna toxunur,gah da burnunu çəkirdi.
-Tiqran məni sevirdi.Sözün əsl mənasında kişi məhəbbəti ilə sevirdi. O mənə hər gün sevgi dolu mesajlar atırdı. İcazənizlə sonuncu yazdığı mesajı oxumaq istəyirəm. Ceferson razılıq əlaməti olaraq başını tərpətdi.
Əzizim Akaki bu gün çox gözəl görünürdün.Elə bil yaxana ulduz qonmuşdu.Gözlərimi səndən çəkə bilmirdim. Mənim məhəbbətimə inan. Hər gün sənin əhvalını soruşmasam dayana bilmirəm.Sən mənə inan. Həm də sənə bir xəbər verim. Mənə başqa reklam şirkətindən iş təklif ediblər. Maaşı da burdan 2 dəfə artıqdır. Hələki səndən başqa heç kimin xəbəri yoxdu. Xahiş edirəm öz aramızda qalsın . Elə sevinirəm ki. Gedəcəyim şirkətdə aldığım ilk maaşdan sənə ən keyfiyyətli tütünü alacam, itimə də yağlı mal əti söz vermişəm. Gecən xeyrə qalsın. Görüşənədək.
Xaş-xaş Akaki məktubu bitirdi. Bütün gözlər bir anda Ceffersona zilləndi.O kürəyini stula söykədi və ağzını büzdü. Bu nə iyrənclikdi? Heç kişi də kişini sevərmi ? Lama İzabella bir anda oturduğu yerdən tüpürdü. Tüpürcəyi Napoleonun portretinə düşdü. Cefferson sözünə davam elədi.
-Tiqranın bu hərəkəti məni yaman təəccübləndirdi. Yox, mən onun başqa reklam şirkətində çalışmaq istəməsini demirəm.Azad seçim,demokratiya var. Mən Xaş-xaş Akakiyə yazdığı sevgi sözləridən bəhs edirəm. Mən çox namuslu və olduqca demokrat insanam. Mənim ürəyim bulanır. Katibə, Ceffersona su gətirdi. O suyu içdi və yenidən sözə başladı. Yaxşı gəlin qayıdaq əsas məsələyə.
Əgər Tiqran sağ qalsa bundan sonra ona necə müraciət edəcəyik ? Mən onu necə çağıracam ? Birdən Ceffersona zəng gəldi.O telefonu götürdü. Hamının eşidəcəyi bir səslə : Salam Həkim. Elə biz indicə ona necə müraciət edəcəyimizi müzakirə edirdik.Amma ağıla batan bir ad tapa bilmədik. Bilirsiniz bu necə dəhşətli bir stiuasiyyadır? Siz hardan biləsiniz axı.Amputasiya etmək ? Yox ! Biz qərara gəldik ki, bu olmasın. Sizə sonsuz təşəkkürlərimi bildirirəm. Neştəriniz qanlı olsun ! –dedikdən sonra telefonu stolun üstünə tulladı. Diqqətlə Napoleonun tüpürcək sallanan portretinə baxdı. Hamı direktorun qərarını alqışladı. Elə mən də alqışladım...
********************
İtalyalı alim, bioloq, kimyaçı Çezare Pavezenin kəşf etdiyi təmizləyici maddə artıq satışdadır. Şərab, boya, mürəkkəb,nar və böyürtkən ləkəsini bir anda yox edir. Hətta pas və qan ləkəsini belə tez bir zamanda aradan qaldırır.
Rusiya ordusunun general mayoru Andrey Suxotovski , dünya kanalların bir neçəsinə təmizləyici maddə ilə bağlı müsahibə verib.
Andrey Suxotovski - “ Biz təbiətimizə xas olaraq müharibə edirik.Əlimizdə qan var.Bu çoxdan bizə bulaşıb.Hər gün qanlı gölməçədə yuyunurduq. Ta ki “_______” tapana qədər. İndi əllərimizdən ukranyalıların qanı rahat çıxır. Artıq buna görə narahat olmuruq. Hətta, yeməyə bir şey tapmayanda biz “_______” bunu da qəbul edirik. Rahat həzm olunur. Biz vəhşi deyilik. Dünya bilsin ki, qalib bizik. Yaşasın Slavyan xalqı ! Yaşasın Rusiya !“
7.
Ceffersonun bəhs etdiyi böyük gün gəlib çatmışdı. Məhz bu gün o, işçilərə maaşlarının artacağı xəbərini verəcəkdi. İşçilər aylardır ki, bu xəbəri gözləyirdilər. Nə vaxtsa direktorla söhbət zamanı əmək haqqı barədə mövzu açılırdı, o şövqlə bu günü işardə edirdi. Hamı şirkətin iclas zalına ( köhnə teatrın zalı ) doluşmuşdu. Zala həm şimal-cənub həm də şərq-qərb tərəfdən baxdıqda yanlız bir şeyin şahidi ola bilərdin- Təbbəsümün. Saça yapışan saqqız kimi təbbəssüm bütün işçilərin üzlərinə yapışmışdı. Hamı deyir-gülür, bir-biriylə zarafatlaşırdı. Birdən qapı cırıltı ilə açıldı. Direktor və idarə heyəti zala daxil oldular. Hamı ayağa qalxdı. Cefferson əliylə əyləşin göstərişini verdikdən sonra çıxış üçün hazırlanmış kürsüyə qalxdı. O çox gərgin, əsəbi görünürdü. Cibindən çıxardığı vərəqi kürsüyə qoyduqdan sonra gözlərini 200 nəfərin gözlərinə zilləyərək ( o bunu bacarırdı) danışmağa başladı.
-Hörmətli işçilər, əziz həmkarlar. Bilmirəm söhbətə haradan başlayım. Mən bu günü səbirsizlikə gözləyirdim. Bilirsiniz, siz mənim ailəmsiniz. Ailənin atası necə ki, ailəsini xoşbəxt görmək istəyir, mən də şirkətin atası olaraq işçilərimi xoşbəxt görmək istəyirəm. Lakin bəzən həyat ataları yorur, incidir, sıxır. Belə olan halda onlar övladlarını sevindirə bilmirlər. Onların üzlərini güldürə bilməmək... Ax bu necə dəhşətli bir vəziyyətdi. Bu gün mən də sizin qarşınızda yorğun ata kimi çıxış edirəm. Yorğun olmağımın səbəbi var. Bu günə olan statistik məlumatlara əsasən deyə bilərəm ki, reklam etdiyimiz məhsulların son səkkiz gündür, satışında kəskin azalmalar var. Mən böyük təəssüf hissiylə, kədərlənərək demək istəyirəm ki, mən sizin maaşlarınızı artıra bilməyəcəm...
Zalı bir anda hay-küy götürdü. İşçilər yerində qurcalanmağa, bir-biriylə söhbət etməyə başladılar. Sükutu direktorun “Bir dəqiqə əzizlərim” ifadəsi kəsdi. Bütün diqqətlərin yenidən özündə cəmləndiyini görən Cefferson sözünə davam elədi.
-Bütün bunların bir səbəbi var. Düz bir həftədir, mənim- şirkətin atasının haqqında qaralama kompaniyalarına başlayıblar. Ard-arda pamfletlər yazırlar, yuxarılara məktublar göndərirlər. Öz dalına şalvar ala bilməyən tüfeyli bir çayxana jurnalisti görün mənim – yəni sizin haqqınızda nə yazıb.
Pamfletdən bir hissə :
Bugünki hadisə başdan ayağa fiasko idi. “Cefferson” reklam şirkətinin rəhbəri, direktoru dövlətin onlar üçün ayırdığı yardımı öz yaxın ətrafı ilə mənimsəyib. Buradan işçilərə bir qəpik də düşməyib. Bununla bağlı müraciət etdiyim rəsmi qurumlardan sonra şəxsimə dair təhdidlər almışam.Mənim pamfletimi dəyərli bir eksponat kimi öz reklam lövhələrində sərgiləyiblər.Bu Azərbaycan Respublikasının Konustusiyasına, Yapon İmperiaysının tabularına, Amerikadakı gürcü səfirliyinin önündə dilənən Codar Qaşqaşvilinin dəyərlərinə, Atları hələdə tapılmayan tək qalmış o şaman şairinin ruhuna hörmətsizlikdir. Heç kəs onlardan üstün deyildir.
Bundan sonra Cefferson məni birbaşa doğratmaqla təhdid edib. Qoçularını üstümüzə göndərməklə nəticə alacağını zənn edənlər, özlərini Stalinə, Hitlərə bənzədərək onların miras qoyduğu qara idarəetmə forması ilə hərəkət edənlər, qanun qarşısında cavab verəcəklər.Artıq bəsdi.
Ey Cefferson ! Sən kralsansa, Berlinin də hakimləri var .
Ölüm Haqdan , Kəfən Məmməcəfərbəydən...
-Düz 7 nəfər mənim yəni sizin haqqınızda bu cür cəfəng yazılar yazıblar.
Təəssüf,bu yazılardan sonra şirkətin nüfuzu aşağı düşdü. Nəticədə nüfuz aşağı düşdükcə çörək də əldən çıxdı. Yəni sizin, mənim övladlarımın çörəyi itdi.
Bütün bunların səbəbkarı o itdöyən jurnalistdi. Bizdə, yəni sizdə nə İMAN qoydu nə də ÇÖRƏK. Hə, bir də unutmayın mən olduqca DEMOKRATİK biriyəm.
Cefferson fikrini tamamladı və kürsüdən düşərək ön sırada əyləşdi.
Zalın suyu qaynamağa başlamışdı. Bu çıxış onun suyunun 55 C-yə qaldırdı. Sonra
Lama İzabella ağır addımlarla kürsüyə qalxdı. Dombalmış gözləriylə ətrafın rentgenini çəkdi və çıxan nəticəni dəyərləndirdikdən sonra danışmağa (tüpürməyə) başladı.
-Uca, mərhəmətli, sevgi dolu, səbirli Yaradanın adıyla sizləri salamlayıram. Əzizlərim bilirsiniz ki,bu günün tez gəlməsi üçün çoxlu dualar edir, nəzirlər verirdim. Ramazan bayramında oruc tutur, heç bir Şabat gününü qaçırmır, İsa Məsihin doğum gününü qeyd edir, evimdə olan kiçik Budda heykəlini təmizləyir, Qızıl tovuzquşu təsvirinin ətrafında dövrələr vurur, Ahuramazdaya hər gün alqışlar söyləyirdim. Amma bu gün olduqca məyus oldum, kədərləndim. Sonra göz yaşlarımı sildim və bura çıxdım ki, sizə bu hadisədə bizim də günahımız olduğunu xatırladım. Bəli, biz günahkarıq. Bizim maaşlarımızın artmamasına səbəb elə özümüzük. Çünki biz Şeytanı, Demonu unutduq.Yadımızdan çıxdı ki, bu dünyada Əhriman da var. İndi biz əlimizi-qolumuzu bağlayıb oturmuşuq. Bəlkə bu zalda oturan bəziləri elə düşünür ki, o əxlaqsız jurnalistin yazdığı doğrudur ?! O şeytandır, şeytandır... İzabella əliylə zalın qapısına tərəf işarə elədi. Sonra uca səslə sözünə qaldığı yerdən davam etdi.
“Burada təəccüblü heçnə yoxdur, çünki Şeytan da nur mələyin cildinə girir“
Bunu mən demirəm Müqqəddəs Kitab deyir. 2-ci Korinflilərə 11:14- ayəsi.
Dünən gecə hövnlak yerimdən dik atıldım. Kabus görmüşdüm.Dəhşətli kabusla bərabər qəribə bir möcüzə də əyan oldu mənə.
Deməli yuxuda gördüm ki, çayın sahilində tək gəzirəm. Bu çay İori çayıdı. Dəqiq bilirəm ki, İori idi. Birdən çayın içindən yeddi kök inək çıxıb çayın qırağında otlamağa başladı. Mən də bunlara tamaşa edirəm. Sonra çayın içindən yeddi arıq inək də çıxdı. Biri zil qaraydı.Bunlar kök inəklər kimi heç otlamadılar da.Sağlam inəklərin üstünə cumub onları parçalayıb yedilər. Mən donub qalmışdım. Gözümdəki yaşın yanağımı yandırdığını yuxuda da hiss edirdim. Birdən göydə nəsə parladı. Gözlərim o andaca qamaşdı. Gözümü açıb gördüm ki, qarşımda başdan-ayağa ağ paltara bürünmüş kök, yaypan bədənli bir kişi durub. Bu kişinin saçı yox idi,amma başında par-par parıldayan bir tacı vardı. Elə bil başına ulduz qonmuşdu. Əlində tutduğu yaşıl rəngə çalan əsayla yerə üç dəfə vurdu. Bu hərəkətdən sonra qeyri-ixtiyarı onun qarşısında təzim etdim. Əlini çiynimə qoydu və mənə dedi ki, mən Əldebaran ulduzundan gəlmişəm. Nəyə görəsə bu sözdən sonra mən rahatladım və ona gördüyüm hadisəni danışdım. Əlini çiynimdən çəkmədən dedi “Qorxma mən sənə kömək edəcəm”.
-Qulaq as İzabella. İori çayından çıxan yeddi sağlam inək o deməkdir ki, yeddi il siz bolluq, artım içində yaşayacaqsınız. Heç bir çətinliyiniz olmayacaq. Bağlarınız barlı,sularınız təmiz olacaq. Sonrakı yeddi il ərzində isə sizi quraqlıq, aclıq gözləyir. Meyvələrinizə, tərəvəzlərinizə qurd düşəcək. Aclıq bir yırtıcı heyvan kimi boğazınızdan yapışacaq. Sularınız qurayacaq. Quraqlığı, natəmizliyi bir libas kimi əyninizə keçirəcəksiniz.Biri-birinin iç-çalatını çıxarmağa hazır olan vəhşi, barbar tayfalar kimi özünüzlə vuruşacaqsınız.Xəstəlik,ağrılar,sancılar sizləri Olimp dağlarına qədər dırmaşdıracaq. Elə bir vaxt gəlib çatacaq ki, ana sağalamaq üçün övladının ətini çiy-çiy yeyəcək. Övlad anasının baş dərisindən sitayiş etdiyi bütlərə paltar tikəcək.
Əldebaran ulduzundan gələn müqəddəsin bu danışdığından sonra mən onun dizlərinə qapanıb yalvardım, vay-şivən qopardım, kömək istədim. O qolumdan yapışaraq ayağa qaldırdı və dedi :
-Qorxma İzabella. Əgər dediklərimi yerinə yetirsən sənə, sənin ətrafına, yaxınlarına və iş yoldaşlarına heç bir fəlakət toxunmaz. Mənə inan. Səhər açılan kimi hamama girib sirkə ilə yuyun. Yemək yeməmişdən qabaq üç dəfə Maidə surəsi 33-cü ayəni indi sənə oxuduğum kimi uca səslə oxu.
“Allaha və Onun Elçisinə qarşı müharibə edənlərin və yer üzündə fitnə-fəsad törətməyə səy göstərənlərin cəzası ancaq öldürülmək, çarmıxa çəkilmək, əlləri və ayaqlarını çarpazvari kəsmək yaxud da yaşadıqları yerdən sürgün edilməkdir.Bu onlar üçün dünyada rüsvayçılıqdır.Axirətdə isə onları böyük bir əzab gözləyir”
Sonra ətrafına,dostlarına,iş yoldaşlarına bu ayəyə uyğun hərəkət etməli olduqlarını söylə. Əgər onlar işlərinizi pozan, çörəyinizi əlinizdən alanlara rəhm etsələr, Yaradan da onlara rəhm etməyəcək. Onları Gehinnom vadisində sonsuz əzaba düçar edəcək.
Unutma İzabella düşmənləriniz 7 gün içində 7 fərqli alətlə cəzalanmalıdır. Yaradanın buyruğu belədi - dedi və bir anda gəldiyi kimi də getdi.
Hamı ovsunlanmışdı. İzabella kürsünün yanından 5-6 addım kənara atıldı. Sonra əliylə giriş qapısının yanında duran şirkətin anbardarına işarə edib, danışmağa başladı ( tüpürməyə )
-Ey mənim əziz həmkarlarım ! Yaradan bizi sevir və bizə çıxış yolu göstərir. Bu müqqəddəs vəzifəni həyata keçirmək sizlərin içərisindən seçilmiş 7 nəfərə qismət olacaq. 200 nəfərdən kim öncə işi həll etdi, Əldebaran ulduzundan yaxasına parıltı düşəcək. Gedin o 7 qara ac inəyi məhv edin ki, ruzimiz tez bir zamanda verilsin, maaşlarımız artsın. Yaradanın buyruğu belədi. – Lama İzabella nitqini bitirdi.
Suyun istiliyi artıq 100 dərəcəyə çatmışdı. Pıqqıltı qopararaq zaldakılar anbardarı, qarşısında duran stol qarışıq dövrəyə aldılar. Anbardar onlara sıraya keçmələrini bildirdi. Hər kəs sırayla anbardardan alət götürməyə başladı. Cefferson da sıranın lap sonunda dayanmışdı.Anbardar aləti verdikcə qarşısında duran kağıza qeydiyyatını aparırdı. Aləti alanlar avşar atılısı kimi çaparaq şirkətdən çıxırdılar.
Alətlər bunlar idi :
Otellonun qılıncı ;
Balta ;
Ov bıçağı ;
Lermantovun tapançası ;
Veronal adlı yuxu dərmanı ;
Obsidiyandan düzəldilmiş əl çapacağı ;
Mauser C96 tapançası .
Mənim bəxtimə Veronal düşmüşdü. Hamı kimi mən də şirkətdən çıxdım.
25 mart
2024
