Edebiyyat.az » Poeziya » Elçin Məhərrəmdən üç şeir

Elçin Məhərrəmdən üç şeir

Elçin Məhərrəmdən üç şeir
Poeziya
admin
Müəllif:
14:39, 14 dekabr 2023
338
0
Elçin Məhərrəmdən üç şeir




“Sükut"


Yaxından gəlir 

gəmi böyürtülərinin səsləri,

Burada gəmilərin başlarını kəsirlər 

sahil "qibləsinə" 

tərəf tutaraq.


Yaxından gəlir 

qağayı çığırtılarının səsləri

Burada qağayılara ümid yedizdirirlər

qurumuş çörək əvəzinə.


Lap yaxından gəlir yalnızlığımın 

səs-küylü sükutu

Nə başımı tapa bilirəm kəsdirəm,

Nə də mədəmi aldada bilirəm

yalançı ümidlərlə...



“Unudulmusan"


Taqqıllatmayanda pəncərəni

hər səhər çörək verdiyin

bozumtul göyərçin,


Hər səhər bağçaya gedən

qonşunun dəcəl uşağı

qapıya təpik ilişdirməyəndə,


Poçtalyon da gözə dəyməyəndə

ta yeni eradan  bu yana, 


göndərdiyin məktub da

saralmağa başlayanda

kənarlardan,


Toqquşmayanda baxışlarınız

divardan asdığın 

qadının portreti ilə


Və telefon əvəzinə

kilsədən gözləyirsənsə

əgər "zəng"in səsini,


Deməli: UNUDULMUSAN....



"Bu nə birincidir, nə də sonuncu"


Hökm verildi.

Qalxdı ağır-ağır

cəllad zamanın iti baltası.


Bu nə birincidir, nə də sonuncu...


Eşafotu yoxdur onun

Edam yeri:  təqaüd aldığın bankomatın qabağı, təyyarənin yumşaq oturacağı, sevgilinlə yatdığın yatağın kənarı...


O gün saydım düz 32 baş tullandı 

boşluğun qara çuxuruna,

Düz 32 min dildə qışqırdı qara çuxur.

Qışqırdı ki: Daha bəsdir yerim yoxdur.

Mən şair ürəyi, rəssam əli, filosof dili istəyirəm.

Göndər gəlsin.

Onlara ki, yerim çoxdur.


Hökm verildi.

Endi bir anda

cəllad zamanın iti baltası

Bir şair infakt keçirdi yeni şeirini yazarkən,

bir rəssamın tikəsini tapdılar top mərmisinin

tozanağı çəkiləndə

bir filosofun dilindən asdılar tanış saat qülləsinin əqrəbindən...


Bu nə birincidir, nə də sonucu...

Ctrl
Enter
ohv tapdınız?
Ctrl+Enter sıxıb bizə bildirin
Müzakirə (0)