Gülər Natiq İsaqdan şeirlər

SEVGİ

adamların ürəyinə narın yağış kimi

çilənən SƏN,

könlümə QAR yağdın...

Miyanə duyğular 

Cüt rəqəmlərlə 

ayırıram zamanı 

Mənə ƏZİZ olandan...

Soyuq ruhlarla əlbəyaxadır,

Əllərimdəki ağrı

silah yerinə!!!

QORXU 

Nitqimi tutan

nə varsa O_san...

***

Xəyallarımdakı 

uzunsaçlısan,

ruhumdakı mənsən Şəms!

Sufiyə aşiq olandan,

məndə oyanandan

bakirəyəm.

Satmadım səni heç bir bədənə.

Biz BƏYAZı bərabər 

paylaşdıq yuxularda. 

NIFRƏT 

Dadmaq istəmədiyim

sərxoş vərdişi,

Əllərimdə oynatdığım

saxsı „can“!

EQO

Harada MƏN varsa, 

orada ÖZ yoxdu, 

orada BİZ

yoxuq! 

2025

Ən sonda...

Bir ümiddir UNUDULMAQ...

Sevilmədiyin yerdən

Isinmədiyin yuvadan

təmənnaya dayanandan

çarə qapısıdır 

salamat çıxmağa...

Bəlkə qəlbinin yağında 

qızaran qəm,

bəlkə qollarında buxov,

bəlkə fələyin xeyrinə saydığıdır 

ömrünə nəsib olmayan. 

Bəlkə də əbədi zindanındır

ağrılarını azadlıq deyə həbs etdiyin...

Bəlkə o torpaqdadır ölməyən ümid,

sahilini 

qürbətin suları

qucaqlayan...

Indi səhra Leylisidir,

tale tüfeylisidir 

vətəndə sevgilər də,

arzular da...

Məcnuna aşiq,

Qeysə məhrum qalmaqdır 

alnına mürəkkəb ucundan düşən damcı...

Vaqifin „çatlamış dodaqlarında

sızıldayar

kor bəxtinə düşməyən qisməti“n...

Bir gün gizlicə doğulacaq 

həqiqətdə görmək istədiyin nə varsa...

...ən sonda...

01.05.2025