Nicat Hunalp - Dərdimə əyilmişəm bir gəmi limanında

Dərdimə əyilmişəm bir gəmi limanında,

Başımdan ayağıma damarımda qan donub

Gözlərimin kədəri siqaret dumanında

Ürəyimdən ayrılıb çiyinlərimə qonub

Dərdimə əyilmişəm bir gəmi limanında,

Gözlərimi dikmişəm buralardan uzağa

Həsrəti içimdədi hələ son baharında,

Saçlarım  yarpaq kimi düşür dən - dən torpağa

Dərdimə əyilmişəm bir gəmi limanında,

Üstümə payız günü bir kədər çöküb ağır

Mən çəkdiyim kədəri, tək Tanrı çəkə bilər,

Kədərim göy üzündən yağışa dönüb yağır

Dərdimə əyilmişəm bir gəmi limanında,

Qağayılara burda ən son ümid yeriyəm

İstanbulun qoynunda tənhalıq limanında,

Ruhuna kədər çökmüş tənhalardan biriyəm

Dərdimə əyilmişəm bir gəmi limanında,

İçdiyim qədəhlərin sayısın itirmişəm

Ümidimin közündə siqar kimi alışıb,

Tüstülənib, sonunda kül qabında ölmüşəm

Dərdimə əyilmişəm bir gəmi limanında,

Özümdəndə ucaya qaldırmışam qəmimi

Gecənin bir yarısı beynimin dumanında,

İtirmişəm o gündən axtarıram gəmimi

Bir bulud ağlayır başımın üstə

Bir az köz atım qoy bu sözə barı,

Fələklə payımı böl yarı - yarı,

Tanrımı göndərib bu buludları,

Bir bulud ağlayır başımın üstə

Özün bax sən Allah bu haya - küyə,

Ürəyim dayanmır o uçuq öyə,

Göy yerə qarışıb,yerdəki göyə,

Bir bulud ağlayır başımın üstə

Burda yaşamımda vallah havayı,

Pərişan görürəm günəşi, ayı,

Kimim kimsəm yox, qəmdən savayı,

Bir bulud ağlayır başımın üstə

Nə qədər adam var içimdə ölən,

Yoxdu ürəyimdə dərdimi bilən,

Nə çoxdu  halıma ürəkdən gülən,

Bir bulud ağlayır başımın üstə

Dayan, bir baş çəkim bu ağacada,

Orda qəlbi kabab, qarnı acada,

Tanrıdan aşağı,məndən ucada,

Bir bulud ağlayır başımın üstə

Heçim ayrı, köçüm ayrı

Heçim ayrı, köçüm ayrı,

Mənlə yoxdu işiniz

Yavan tikədə qalıb,

Kabablarda dişiniz

Heçim ayrı, köçüm ayrı,

Mən kiməm axı, siz kim

Kütlələrə qarışmaram,

Mənə bəsdi təkliyim

Heçim ayrı, köçüm ayrı,

Olsun, sizin Yupiter

Ay, bu bulud, yağan yağış,

Sizinkidi, onsuz yer

Heçim ayrı, köçüm ayrı,

Nə düşmüsüz canıma

Göy yaxşıdı, durum gedim,

Mən Tanrının yanına

Uçuruma bir addım

(Uzun şeir)

Dünən gecə içimdə dəhşətli bir zəlzələ,

Təxminən haradasa beş-altı bal gücündə

Uçsaydı ev başıma  tikəm gəlməzdi ələ

Gizlənə bilməsəydim vicdanımın içində

Hava çiskin yağışlı,önüm qatı sis - duman,

Əlimdə BMT-nin sülh adında çətiri

Damağımda qırmızı şvesarski Vinston

Dalbadal yandırıram sigarımı bitirib

Sülhməramlı pərdəsi altında işğalçılar,

Sülhü bərqərar edir Bağdadda ya Kabildə?

Çıxıb oxundan gəlir üstümə göy qübbəsi,

Allah qapısın açır üzümüzə Babildə

Gözümü zilləmişəm nəhəng Şeytan çarxına,

Burdan durub Məkkədə şeytana daş atıram

Rio De Janeyroda İsanın heykəlinin,

Ən ucunda dayanıb, mən başımı qatıram

Küçənin ən sonunda qaranlıq bir dalanda,

Gizlədirəm özümü yarasa tək hamıdan

Burda nə qədər adam qəsd edib damarına,

Unudubdu  her şeyi, dönübdü  Allahından

Qarışıram şəhərin meqapolislərinə,

Ruhumun kədərindən doğuluram təzədən

Baxıram göy üzündə təyyarə izlərinə,

Çıxıb getmək isteyir ruhumda bu ölkədən

Bir payız axşamında istəyirəm qoşulam,

Çıxam gedəm bir yolluq durna qatarlarında

Hüqonun Qavroşu tək küçələrdə üşüyüm,

Yağış sızsın üstümə evin divarlarından

Çəkdiyim sigarların kötüyünə əyilir,

Ciyərimə yığılan siqarımın tüstüsü,

Liviyada ərəblər ip bağlayıb yıxdılar,

Bir zaman tapdıqları Qəddafinin büstünü

Çəkilirəm içimdə tikdiyim o daxmaya,

Azca hisə verilmiş balıq, bir qədəh şərab

Yaslanıram taxtadan düzəltdiyim yatağa,

Dərd yerinə alıram qəlyandan iki qullab

Səhər tezden oyanıb qaçıram konfransa,

Köynəyim ütüsüzdü, saç saqqalım dağınıq

Türksoydan bir nəfərlə yolumuzda bir düşüb,

Salam, əziz soydaşım, ikimiz bir yoldanıq

Danışırıq, yol boyu siyasətden doyunca,

Uyğurlardan söz düşür ürəyimə ox batır

Elə bil ki yenidən üsyana hazırlaşır,

Günəşin batdığı yerlərdə Osman Batır

Alovlanır, odlanır ruhum, cismim, bədənim,

Göytürklərdən gələn qan damarımda dolaşır

Sığa bilmir sərhədlər içrə mənim qələmim,

Altaylardan Batıya, Ötükənə yol aşır

Konfransı bitirib dayanacağa doğru,

Yeyin addımlar ilə yol gedirəm fikirli

Yağış yağır yenicə aldığım jaketimə,

Təzədi deyə hələ, çoxdu məndə xətiri

Soyuyuram getdikcə bu müasir dünyadan,

Elm texnologiya, yeni nəsil robotları

Ən gözəli bozqırda köç halında yaşayış,

Vəhşi çöllərdə çapır hələ monqol atları

Məkkənin qapısında dayanıbdı Hülagü,

Atlarının ayağı çeyneyir tüm cahanı

Savaşların birində topal qalmış sərkərdə,

Böyük Teymur adıyla şanlandırdı Turanı

Yaxın gəl ey balaca, bax özünə güzgüdə

Gör kimin nəvəsisən, gör kimə var oxşarın

Xorasandan Dehliyə qoşun çəkən baban var,

Tarixin son Fatehi Nadir Şah bəy Əfşarın

Yavaş - yavaş sökülür içərimdə daha dan,

Yaddaşım təyyarədə yazılı qara qutu

Açıram gözlərimi otağın ortasında,

Uzadılıbdı yerə ümidimin tabutu

Sığınmağa yerim yox, tək Tanrıdan savayı,

Daşıyıram ruhumu özümdəndə dərində

Beynimin son qatında böyük atom bombası,

Partlayacaq bir azdan ruhumun son yerində

Uçuruma doğru yol, bir iz varsa de gedim

Özümü atmaq kimi əyləncəm var uçrumdan

Tanrım özün bağışla, gəl məni burax gedim,

Xilas eylə nə olar, məni yorğun ruhumdan

Şaman yozur yuxumu

Dərd etdi köz - köz içimi,

Yandırdı bu söz içimi,

Din insanların seçimi,

Türklük isə qədəridir

Yenilmədim ata dərdə,

Sözüm, şeirim göydə-yerdə,

Məndəki bu qəm kədərdə,

Tanrımızın kədəridir

Yuxularım didərgin, yuxumu şaman yozur,

Şaman yozur yuxumu, yuxumu daşa yazır,

Ötükəndə kədərdən mənə bir qəbir qazır,

Xaqanlar da görür ki, bu bir türk qəbridir

Keçməz ruhumdakı kin,

Mətə, Muğan, Alptəkin,

Batıya qoşun çəkin,

Savaş türk zəfəridir

Orxonda ataların izi,

Əcdad ruhlarının səsi,

Tanrım Turanın çarəsi,

Özünə dönməkdədir