Edebiyyat.az » Poeziya » Marina Svetayeva (Rusiya) - Yuxusuzluq

Marina Svetayeva (Rusiya) - Yuxusuzluq

Marina Svetayeva (Rusiya) - Yuxusuzluq
Poeziya
admin
Müəllif:
17:35, 27 sentyabr 2023
170
0
Marina Svetayeva (Rusiya) - Yuxusuzluq


 

 

Bu gecə, 

bu gecə yalqızam necə –

Bir yurdsuz, yuxusuz rahibəyəm mən! 

Tək-tənha qaldığım bu sonsuz gecə 

Bütün bu şəhərin sahibiyəm mən! 

 

Yuxusuzluq alıb aparır məni...

- Kreml, gözəlsən, gözəl! Bu gecə

Savaş içindəki Yer kürəsini

Bağrıma basardım, öpərdim necə! 

 

Külək də elə bil dərddi, acıqdı, 

Sıxır ürəyimi, sıxır beləcə. 

Bu gecə yazıqlar daha yazıqdı, 

Bir də öpülənlər yazıqdı məncə. 

 

 

* * *

 

 

Nəyim var, ayrılıb hər birisindən 

Könülsüz-könülsüz gedirəm, ancaq – 

Bu xəz kürküm mənim qurd dərisindən 

Heç bilmirəm kimə qismət olacaq. 

 

Kimi kövrəldəcək isti yun şalım, 

Kim mənim itimə sahib çıxacaq? 

Üstü firuzəli gümüş qolbağım

Kimin biləyində parıldayacaq? 

 

Kimin olasıdır, gözümü yumsam, 

Bu məktublar kimin, çiçəklər kimin... 

İçimdən sürüşən sonuncu misram, 

Bir də sən, bir də sən, son gecəm mənim! 

 

 

Cevirəni Mahir N. Qarayev

Ctrl
Enter
ohv tapdınız?
Ctrl+Enter sıxıb bizə bildirin
Müzakirə (0)